MGS - Minimal Gear Snack［小遊戲］

最近用 Vibe Code 整咗一隻小遊戲，相信有打機嘅人都會知道，呢隻遊戲靈感來自《Metal Gear Solid》呢隻潛行遊戲。遊戲玩法就係要令到你嘅角色避開士兵嘅視線由起點成功去到終點。

今次我主要用 https://atoms.dev 呢個 AI coding 平台去製作，佢背後嘅技術係用緊 MetaGPT 呢個 open source project。

最初我係想試下用one shot prompt 去完成呢隻遊戲，所以用咗比較長嘅時間去設計成個prompt，當中包括咗遊戲嘅玩法、設計嘅風格、成功和失敗嘅條件、士兵嘅巡邏方式以及發現玩家後嘅反應。其實如果要求唔高嘅話，佢喺第一 shot 已經可以畀人玩得，不過始終有啲細節，例如遊戲規則、士兵步行嘅方式，都要不斷慢慢試、慢慢修改。

由於前幾日參加咗 Lonely Octopus 舉辦嘅 Builder Night 活動，有免費 account 試用，比賽完咗之後利用餘下嘅 credit 去做呢隻 game。

本來打算全隻 game 都用 atoms.dev 去完成，可惜去到最後階段，用晒所有 token，最後都要 export 啲檔案出嚟，放入我平時用開嘅 VS Code，用 GitHub Copilot 做初版嘅最後階段。

我想邀請你開呢條 link 試下個遊戲，希望你都覺得有趣味，歡迎留言話畀我聽，俾啲意見，我會繼續改善隻 game。如果有人有興趣嘅話，我可以開個 public repo 出嚟，大家一齊參與改進。